ನಮ್ಮ ಮನೆಗಳ ಸುತ್ತಮುತ್ತ, ರಸ್ತೆ ಬದಿಗಳಲ್ಲಿ ಯಾವುದೇ ವಿಶೇಷ ಆರೈಕೆಯಿಲ್ಲದೆ ಸದಾ ಕಾಲ ಹೂ ಬಿಟ್ಟು ಕಂಗೊಳಿಸುವ ಗಿಡವೇ ನಿತ್ಯ ಪುಷ್ಪ. ಇದನ್ನು ಸದಾಪುಷ್ಪ, ಕಾಸಿಕಣಗಿಲೆ ಅಥವಾ ಇಂಗ್ಲಿಷ್ನಲ್ಲಿ ‘ಮಡಗಾಸ್ಕರ್ ಪೆರಿವಿಂಕಲ್’ (Madagascar Periwinkle) ಎಂದು ಕರೆಯಲಾಗುತ್ತದೆ. ಬಿಳಿ ಮತ್ತು ಗುಲಾಬಿ ಬಣ್ಣದ ಹೂವುಗಳನ್ನು ಬಿಡುವ ಈ ಸಸ್ಯವು ಕೇವಲ ಅಲಂಕಾರಿಕ ಗಿಡವಲ್ಲ. ಇದು ಆಯುರ್ವೇದ ಮತ್ತು ಆಧುನಿಕ ವೈದ್ಯಕೀಯ ಲೋಕದಲ್ಲಿ ಅತ್ಯಂತ ಪ್ರಮುಖ ಸ್ಥಾನ ಪಡೆದಿರುವ ಪ್ರಕೃತಿಯ ಒಂದು ಅಮೂಲ್ಯ ಕೊಡುಗೆಯಾಗಿದೆ. ನಿತ್ಯ ಪುಷ್ಪ ಗಿಡದ ಪ್ರಮುಖ ಉಪಯೋಗಗಳ ತಿಳಿಯೋಣ:
ಮಧುಮೇಹ ನಿಯಂತ್ರಣಕ್ಕೆ ರಾಮಬಾಣ
ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸುವಲ್ಲಿ ನಿತ್ಯ ಪುಷ್ಪ ಅತ್ಯಂತ ಪರಿಣಾಮಕಾರಿ. ಈ ಗಿಡದ ಎಲೆಗಳು ಮತ್ತು ಹೂವುಗಳಲ್ಲಿ ಇನ್ಸುಲಿನ್ ಉತ್ಪಾದನೆಯನ್ನು ಉತ್ತೇಜಿಸುವ ನೈಸರ್ಗಿಕ ಅಂಶಗಳಿವೆ. ಇದರ ಎಲೆಗಳ ಕಷಾಯ ಅಥವಾ ಒಣಗಿಸಿದ ಎಲೆಯ ಪುಡಿಯನ್ನು ನಿಯಮಿತವಾಗಿ ಸೇವಿಸುವುದರಿಂದ ಮಧುಮೇಹವನ್ನು ಹತೋಟಿಯಲ್ಲಿಡಬಹುದು.
ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಪ್ರಮುಖ ಪಾತ್ರ
ಆಧುನಿಕ ವೈದ್ಯಕೀಯ ಜಗತ್ತಿನಲ್ಲಿ ನಿತ್ಯ ಪುಷ್ಪಕ್ಕೆ ಅಪಾರ ಬೇಡಿಕೆಯಿದೆ. ಈ ಸಸ್ಯದ ಬೇರು ಮತ್ತು ಎಲೆಗಳಲ್ಲಿ ‘ವಿನ್ಕ್ರಿಸ್ಟಿನ್’ (Vincristine) ಮತ್ತು ‘ವಿನ್ಬ್ಲಾಸ್ಟಿನ್’ (Vinblastine) ಎಂಬ ಪ್ರಬಲ ಆಲ್ಕಲಾಯ್ಡ್ಗಳಿವೆ. ರಕ್ತದ ಕ್ಯಾನ್ಸರ್ ಮತ್ತು ಸ್ತನ ಕ್ಯಾನ್ಸರ್ನಂತಹ ಮಾರಕ ಕಾಯಿಲೆಗಳ ಕಿಮೋಥೆರಪಿ ಚಿಕಿತ್ಸೆಯ ಔಷಧಗಳನ್ನು ತಯಾರಿಸಲು ಈ ಸಸ್ಯವನ್ನು ಬಳಸಲಾಗುತ್ತದೆ.
ರಕ್ತದೊತ್ತಡ ನಿರ್ವಹಣೆ
ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿರುವವರಿಗೆ ನಿತ್ಯ ಪುಷ್ಪ ಸಹಕಾರಿಯಾಗಿದೆ. ಇದರಲ್ಲಿರುವ ‘ಅಜ್ಮಾಲಿಸಿನ್’ ಎಂಬ ರಾಸಾಯನಿಕ ಅಂಶವು ರಕ್ತನಾಳಗಳನ್ನು ಸಡಿಲಗೊಳಿಸಿ, ರಕ್ತ ಪರಿಚಲನೆಯನ್ನು ಸುಗಮಗೊಳಿಸುತ್ತದೆ. ಇದು ಹೃದಯದ ಮೇಲಿನ ಒತ್ತಡವನ್ನು ಕಡಿಮೆ ಮಾಡಿ, ರಕ್ತದೊತ್ತಡವನ್ನು ಸಮತೋಲನದಲ್ಲಿಡುತ್ತದೆ.
ತ್ವಚೆಯ ಸಮಸ್ಯೆ ಹಾಗೂ ಗಾಯಗಳಿಗೆ ಪರಿಹಾರ
ನಿತ್ಯ ಪುಷ್ಪದಲ್ಲಿ ಬ್ಯಾಕ್ಟೀರಿಯಾ ನಿರೋಧಕ ಗುಣಗಳು ಸಮೃದ್ಧವಾಗಿವೆ. ಚರ್ಮದ ಮೇಲಿನ ಕಪ್ಪು ಕಲೆಗಳು, ಮೊಡವೆಗಳು ಮತ್ತು ಅಲರ್ಜಿ ನಿವಾರಣೆಗೆ ಇದರ ಎಲೆಯ ರಸವನ್ನು ಹಚ್ಚಬಹುದು. ಯಾವುದೇ ಕೀಟಗಳು ಕಡಿದಾಗ ಅಥವಾ ಚರ್ಮದ ಮೇಲೆ ಗಾಯಗಳಾದಾಗ ಇದರ ಎಲೆಗಳನ್ನು ಅರೆದು ಹಚ್ಚುವುದರಿಂದ ಗಾಯಗಳು ಬೇಗನೆ ಒಣಗುತ್ತವೆ ಮತ್ತು ಸೋಂಕು ಹರಡುವುದಿಲ್ಲ.
ಮಾನಸಿಕ ಒತ್ತಡ ಮತ್ತು ಜ್ಞಾಪಕಶಕ್ತಿ ವೃದ್ಧಿ
ಬದಲಾಗುತ್ತಿರುವ ಇಂದಿನ ಜೀವನಶೈಲಿಯಲ್ಲಿ ಮಾನಸಿಕ ಒತ್ತಡ, ಆತಂಕ ಸಾಮಾನ್ಯವಾಗಿದೆ. ನಿತ್ಯ ಪುಷ್ಪದ ಸಾರವು ನರಮಂಡಲವನ್ನು ಶಾಂತಗೊಳಿಸಿ ಒತ್ತಡವನ್ನು ನಿವಾರಿಸಲು ನೆರವಾಗುತ್ತದೆ. ಅಷ್ಟೇ ಅಲ್ಲದೆ, ಇದು ಮೆದುಳಿಗೆ ರಕ್ತ ಸಂಚಾರವನ್ನು ಹೆಚ್ಚಿಸಿ, ಏಕಾಗ್ರತೆ ಮತ್ತು ಜ್ಞಾಪಕಶಕ್ತಿಯನ್ನು ಉತ್ತಮಗೊಳಿಸುತ್ತದೆ.
ಇದನ್ನೂ ಓದಿ:
ಮುನ್ನೆಚ್ಚರಿಕೆಗಳು:
ನಿತ್ಯ ಪುಷ್ಪ ಗಿಡವು ಅತ್ಯಂತ ಶಕ್ತಿಶಾಲಿ ರಾಸಾಯನಿಕಗಳನ್ನು ಒಳಗೊಂಡಿರುವುದರಿಂದ, ಇದನ್ನು ನೇರವಾಗಿ ಸೇವಿಸುವುದು ಆರೋಗ್ಯಕ್ಕೆ ತೊಂದರೆ ಆಗಬಹುದು.ಗರ್ಭಿಣಿಯರು ಮತ್ತು ಸಣ್ಣ ಮಕ್ಕಳು ಇದರ ಬಳಕೆಯಿಂದ ದೂರವಿರಬೇಕು.ಯಾವುದೇ ಮನೆಮದ್ದಾಗಿ ಬಳಸುವ ಮುನ್ನ ಆಯುರ್ವೇದ ತಜ್ಞರ ಅಥವಾ ವೈದ್ಯರ ಸೂಕ್ತ ಸಲಹೆ ಮತ್ತು ಪ್ರಮಾಣವನ್ನು ಪಡೆದುಕೊಳ್ಳುವುದು ಅತ್ಯಗತ್ಯ.
